Nga sot emigrantët që mbërrijnë në Britani në mënyrë të paligjshme, përfshirë këtu edhe shqiptarët, do të ndalohen të kërkojnë azil ose të përdorin ligjin për të drejtat e njeriut për të ndaluar dëbimin e tyre.
Kryeministri britanik, Rishi Sunak i tha The Sun se projektlogji i tij i ri për emigracionin e paligjshëm do të marrë përsëri kontrollin e kufijve, një herë e përgjithmonë.
Projektligji i Emigracionit Ilegal do të lejojë që vetëm moshat nën 18 vjeç dhe të sëmurët do të lejohen të aplikojnë për azil në Britani. Të gjithë të ardhurit e tjerë do të deportohen në venin nga vijnë ose në një vend të tretë të sigurt si Ruanda.
Ndërsa ata presin dëbimin, parqet e pushimeve, akomodimi ushtarak, madje edhe anijet turistike do të përdoren për të strehuar emigrantët në vend të hoteleve të shtrenjta që ishin përdorur deri tani. Legjislacioni, i publikuar me disa muaj vonesë, do të pranojë hapur rrezikun e shkeljes së Ligjit për të Drejtat e Njeriut duke shkaktuar një luftë të madhe me aktivistët dhe avokatët e Partisë Laburiste dhe pro kufijve të hapur.
Kujtojmë se një numër i konsiderueshëm i emigrantëve të paligjshëm janë edhe me shtetësi shqiptare. Ata kanë zgjedhur të futen në tokën e ëndrrave përmes varkave, apo me kamionë duke paguar shuma të mëdha parash, që shpesh i kanë marrë borxh me shpresën se do të punojnë dhe do t’i shlyejnë.
