Detaje të reja janë zbardhur rreth ngjarjes së rëndë të ndodhur në Shkodër.
Alma Arrazi, 39-vjeçarja e cila dyshohet se është vetëmbytur bashkë me 3 fëmijët e mitur, dy prej tyre të gjetur të pajetë tanimë, për herë të fundit është takuar me kunatën e saj.
Më datë 2 maj ajo është takuar me kunatën dhe i ka thënë se do priste vëllain për ta marrë me taksi pasi do shkonte një jave tek shtëpia e tij që të qetësohej, citon JOQ.
Kamerat e sigurisë kanë treguar se 39-vjeçarja dhe 3 fëmijët e saj janë larguar pas dy orësh nga lokali dhe së bashku kanë ecur në trotuarin e rrugës që të çon te “Ura e Bunës” së vjetër, në drejtim të “Kishës së Zojës”, Shkodër. Dalja nga lokali është në orën 20:10 të datës 02.05.2024.
Ndërkohë më datë 4 maj, rreth orës 22:00, shërbimet e policisë janë njoftuar se ështe gjetur trupi i pa jetë i një fëmijë të mitur, në anë të lumit Buna në fshatin Darragjat. Nga kqyrja e kufomës është konstatuar se ky trup i përket vajzës 9-vjeçare e cila ishte zhdukur me mamanë dhe vëllain e motrën që prej datës 2 maj. Ndërsa ditën e sotme në lumin Buna është gjetur edhe trupi i pajetë i vajzës tjetër të familjes Arrazi.
Prokuroria ka dyshime se Erdgys Arrazi, si rrjedhojë e dhunës psikologjike të vazhdueshme ndaj bashkëshortes së tij, shfaqur në formën e ofendimeve të vazhdueshme dhe tradhtisë bashkëshortore, duke prekur rëndë dinjitetin e saj, ka shkaktuar vetëvrasjen e shtetases Alma Arrazi e cila në gjendje të rënduar psikologjike dyshohet të jetë hedhur në lum bashkë me tre fëmijët e mitur.