Shefi ekzekutiv i TikTok ka pranuar se të dhënat e përdoruesve mund të aksesohen nga kompania e saj mëmë kineze. Në një seancë dëgjimore të Kongresit Amerikan, Shou Zi Chew i tha Komitetit të Energjisë dhe Tregtisë së Dhomës se stafi në Kinë aktualisht ka aftësinë për të parë informacionin e përdoruesve të TikTok.
“Ne mbështetemi në ndërveprueshmërinë globale dhe kemi punonjës në Kinë, kështu që po, inxhinierët kinezë kanë qasje në të dhënat globale”, tha ai.
Në një seancë konfrontuese, shefi i TikTok nuk arriti të fitonte anëtarët e Kongresit, të cilët po shqyrtojnë nëse do t’i jepnin Joe Biden kompetenca për të ndaluar aplikacionin.
Cathy McMorris Rodgers, kryetarja republikane, tha: “Platforma juaj duhet të ndalohet. TikTok është një armë nga CCP [Partia Komuniste Kineze] për t’ju spiunuar, për të manipuluar atë që shihni dhe për të shfrytëzuar brezat e ardhshëm.”
Chew, i cili është me qendër në Singapor, u tha anëtarëve të Kongresit se ai nuk kishte folur me një zyrtar të qeverisë kineze që kur mori përgjegjësinë dy vjet më parë dhe se ai nuk kishte “asnjë provë” që të dhënat e përdoruesve të TikTok ishin aksesuar nga qeveria kineze.
Kur u pyet nëse BetyDance, kompania mëmë e Tik Tok ka qenë në gjendje të spiunojë stafin, ai tha: “Unë nuk mendoj se spiunimi është mënyra e duhur për ta përshkruar atë.”
Chew tha se punonjësit e ByteDance në Kinë nuk do të kenë akses në të dhënat e përdoruesve amerikanë deri në fund të vitit, kur do të përfundojë një plan prej 1.5 miliardë dollarësh (1.2 miliardë £) për të transferuar të dhënat në gjigantin e IT Oracle. Kompania nuk ka bërë premtime ekuivalente për të dhënat e përdoruesve në Mbretërinë e Bashkuar dhe evropiane.
Qeveria amerikane i ka thënë TikTok se do ta ndalojë atë në SHBA nëse nuk shkëputet nga aksionerët e saj kinezë. Nga ana tjetër të enjten, Kina kërcënoi se do të bllokonte një shitje të detyruar të aplikacionit, duke thënë se do të “kundërshtonte fuqishëm” planin e administratës Biden për të hequr aplikacionin e videos virale nga duart kineze.
Ministria e Tregtisë tha se një veprim i tillë do të godiste besimin e investitorëve ndërkombëtarë në SHBA. Në përgjigje të ndalimit të TikTok nga pajisjet qeveritare, Chew tha se nuk besonte se asnjë aplikacion i mediave sociale duhet të ishte në telefonat zyrtarë.
