Kur vjen fjala te batutat, kryeministri shqiptar Edi Rama padyshim që i lë në hije kolegët e tij të rajonit, edhe kur shakatë bëhen për një çështje serioze si njohja e pavarësisë së Kosovës nga ana e Serbisë, që mban peng fatin e miliona shqiptarëve përtej kufirit.
I pranishëm sot në forumin ekonomik të minishengenit ballkanik, që tashmë do të ketë edhe një emër të ri “Ballkani i Hapur”, Rama dhe Vuçiç i Serbisë, nuk e kanë fshehur përkujdesjen ndaj njëri tjetrit, ku nuk drejtoheshin as formalisht, por thërriteshin në emër.
Pa harruar faktin që në këtë takim nuk ishin zyrtarët e Kosovës, Malit të Zi dhe Bosnjes, Rama në një moment bën humor me njohjen e pavarësisë së Kosovës, por shpejt e tejkalon bisedën duke thënë se në forum nuk ishte për këtë çështje.
Batutat e Ramës me Vuçiç:
Vucic: Çfarëdo të thotë Edi unë do ta mbështes. 100 për qind. Ndaj këtë po e them paraprakisht dhe mos më pyesni pse dhe për çfarë. Unë do ta mbështes, ta dini
Rama: Tani Aleksandër pretendon që unë të them se kërkoj njohjen e Kosovës dhe ai nuk do ta miratojë këtë, edhe pse thotë 100 përqind e mbështes fjalën e Edit. Por nuk jemi këtu për këtë sepse Marko si një njeri që ndërhyn për zgjidhje mosmarrëveshjes, kërkon që unë të flas për BE, por ne jemi këtu për rajonin.
