Që taksitë në Tirana International Airport SHPK po abuzojnë me çmimet prej kohësh, tanimë dihet. Çmime të papërballueshme për këdo udhëtar, që në rast nevoje është i detyruar të “ulë kokën” përballë shumave të konsiderueshme, e të paguajë për shifrën e kërkuar. Madje është krijuar një monopol pasi nuk lejohet të hyhet asnjë taksi private.
Këto abuzime kanë rënë më në fund në vesh të Autoritetit të Konkurrencës, e cili ka njoftuar hapjen e procedurave të hetimit paraprak ndaj kësaj ndërmarrje në tregun e shërbimit taksi, për udhëtarë nga dhe drejt Aeroportit Ndërkombëtar të Tiranës.
“Në mbledhjen e zhvilluar ditën e sotme, është marrë nën shqyrtim rasti i kësaj ndërmarrjeje, pas dyshimeve për abuzime me ofrimin e shërbimeve/produkteve duke u vendosur ato në kushte të pabarabarta konkurrence. Përmendim që shoqëria e shërbimit taksi nga Rinasi është denoncuar vazhdimisht për çmimet tejet të kripura që ofron.
Sipas Autoriteti të Konkurrencës, ndërmarrja Tirana International Airport SHPK në tregun e shërbimit taksi, mund të jetë para shkeljes së nenit 9 të ligjit nr. 9121, datë 28.07.2003 “Për mbrojtjen e konkurrencës”. Ndaj, sot më datë 11 Maj 2023, është vendosur nisja e hetimit paraprak.” – thuhet në njoftim.
Por sesa guxim do të ketë Autoriteti i Konkurencës për të dënuar e për të vendosur gjoba, kjo mbetet për tu parë.