Vazhdojnë përsëri çudirat në këtë vend që quhet Shqipëri. Është vërtet e habitshme se si çdo ditë jepen tendera të dyshimtë në vlera që shkojnë nga qindra milionë e deri në dhjetra miliarda lekë. Nuk dihet nëse ka ndonjë autoritet që i heton realisht këto tendera, por megjithatë ajo që dihet është se abuzimet me tenderat vazhdojnë të jenë sporti i parapëlqyer i drejtuesëve të institucioneve shqiptare.
Në rastin më të fundit kemi të bëjmë më një tender të dhënë nga Blendi Gonxhja, që ngjall jo pak dyshime. Bëhet fjalë për tenderin me numër reference REF-91932-03-30-2021 dhe me objekt “Rikonstruksionet për Qëndrën e Kontrollit Teknik në DRSHTRR Vlorë”. Fondi limit i këtij tenderi është 57,523,407 lekë të reja pa TVSH. Le t’i hedhim një sy dokumentave të kësaj procedure.
Vihet re se në garë kanë marrë pjesë vetëm katër kompani. Nga këto të katra, dy prej tyre kanë ardhur sa për numër, pasi për habi kanë ofruar zero lekë. Natyrshëm lind pyetja se përse kanë marrë mundimin të hyjnë në një garë kur nuk kanë ofruar asnjë vlerë? Përgjigjia besoj merret me mend. Pra siç e shikoni, 50% e firmave pjesëmarrëse në garë kanë ofruar vlerën zero, një shifër kjo mjaft absurde nëse tenderi do të ishte i rregullt.
Le të kalojmë në dy pjesëmarrësit e mbetur. Ata janë bashkimi i operatorëve “NG STRUCTURES” & “METEO” me ofertë 57,212,061 lekë të reja pa TVSH, ose rreth 700 milionë lekë të vjetra me TVSH dhe firma “GERARD-A” me ofertë 41.254.251 lekë të reja pa TVSH, ose rreth 500 milionë lekë të vjetra me TVSH. Këto ndodh çudia e rradhës. Ndonëse kriteri i përzgjedhjes së fituesit është çmimi më i ulët, fitues është shpallur bashkimi i operatorëve “NG STRUCTURES” & “METEO” të cilët kanë ofruar gati 200 milionë lekë të vjetra me TVSH më tepër sesa pjesëmarrësi tjetër.
Por cilët janë pronarët e kompanive fituese? NG STRUCTURES është në pronësi të shtetasit Hekuran Hoxha kurse “METEO” rezulton të jetë në pronësi të shtetasit Eral Myftaraj. Përtej kësaj, kjo vlerë fituese është thuajse e njëjtë më vlerën e fondit limit, përkatësisht është sa 99.45% e tij. Si përfundim, të gjitha faktet e mësipërme ngrenë dyshime se fituesi i tenderit mund të ketë qenë i paracaktuar.
