Aurora Tila, 13-vjeçarja shqiptare që humbi jetën më 25 tetor 2024 në Piacenza, nuk u vetëhodh nga tarraca e pallatit ku banonte me nënën e saj, por u shty.
Kjo është hipoteza e konfirmuar nga autopsia, e cila zbuloi se lëndimet e saj nuk përputheshin me një akt vetëvrasjeje. Mjeku ligjor Giovanni Cecchetto ka deklaruar se provat tregojnë një skenar të dhunshëm, duke forcuar dyshimet e ngritura nga hetuesit.
Si autor i dyshuar i krimit është arrestuar ish-i dashuri i saj, një 15-vjeçar, i cili ndodhet në burg nën akuzën për vrasje me dashje. Sipas hetimeve, ai e shtyu Aurorën nga ballkoni, duke i dhënë fund jetës së saj tragjikisht.
Dëshmitarët raportuan se vajza u përpoq të shpëtonte duke u kapur pas parmakut, por i riu e goditi me forcë në duar, duke e detyruar të binte në boshllëk. Ky detaj i rëndë, i mbështetur nga dëshmi të shumta, ka çuar në forcimin e akuzave ndaj të dyshuarit, ndërsa hetimet vazhdojnë për të zbardhur plotësisht rrethanat e krimit.
