Zjarret masive në pyjet në qytetin bregdetar turk, Antalia, që kanë filluar prej ditës së djeshme, kanë shkaktuar tri humbje jete.
“Tre persona humbën jetën dhe 122 të tjerë u lënduan nga zjarret në qarkun Manavgat”, tha në një deklaratë Autoriteti i Menaxhimit të Fatkeqësive dhe Emergjencave.
“Trajtimi i 58 personave vazhdon në spitale”, shtoi AFAD.
“Shumë shtëpi, vende pune, hambare, toka bujqësore, serra dhe automjete u dëmtuan për shkak të zjarrit”, vazhdoi AFAD, duke shtuar se 12 ekipe po kryejnë aktualisht vlerësimin e dëmeve.
Në përpjekjet për vënien nën kontroll të 10 vatrave të zjarrit janë angazhuar gjithsej 1 832 zjarrfikës, tre avionë, 29 helikopterë dhe vënë në dispozicion 458 cisterna uji.
Ministria e Bujqësisë dhe Pyjeve ka angazhuar gjithashtu një helikopter pa pilot për shuarjen e zjarrit në Manavgat.
Helikopteri pa pilot, i projektuar për të mbështetur pikën e kontrollit përmes kamerës termike dhe sensorëve të tij me rezolucion të lartë, mund të qëndrojë në ajër deri në tetë orë.
