Pavarësisht dëmeve të mëdha në objektivat bërthamore, Irani mund të rikthejë prodhimin falë njohurive teknike dhe strukturave të fshehta
Programi bërthamor i Iranit, që vetë Teherani e ka përshkruar gjithmonë si paqësor, ka pësuar dëme të konsiderueshme gjatë tensioneve të fundit. Megjithatë, ai nuk është eliminuar plotësisht.
Burime të shumta konfirmojnë se sasi të mëdha të uraniumit të pasuruar – komponent thelbësor për ndërtimin e një arme bërthamore – janë depozituar qindra metra nëntokë, në kompleksin e mbrojtur fort të Fordos, nën vargmalin Zagros.
Sipas ekspertëve ushtarakë, shkatërrimi i plotë i këtij objekti do të kërkonte bombardime të vazhdueshme nga Forcat Ajrore të SHBA-së, me përdorimin e armës së njohur si Massive Ordnance Penetrator (MOP), e projektuar për të depërtuar thellë në bunkerët nëntokësorë.
Megjithatë, për të verifikuar në mënyrë të sigurt shkatërrimin e uraniumit të dyshuar në Fordo, do të nevojitej konfirmim vizual i drejtpërdrejtë në terren dhe në nëntokë. Një mision i tillë mund të realizohej vetëm përmes rrjetit të spiunazhit të agjencisë izraelite Mossad, ose nëpërmjet një sulmi të drejtpërdrejtë nga forcat speciale. Të dyja opsionet mbeten jashtëzakonisht të rrezikshme.
Ndërkohë ekziston frika se Irani mund të ketë shpërndarë pajisje dhe materiale në vende të panjohura, jashtë radarëve të komunitetit ndërkombëtar.
Për më tepër, edhe në rast se infrastruktura aktuale neutralizohet, ekspertët paralajmërojnë se Republika Islamike e Iranit mund të rifillojë programin falë njohurive të ruajtura nga shkencëtarët e saj.
Kjo kapacitet i mundshëm i ripërtëritjes së teknologjisë bërthamore shihet nga regjimi si një garanci për mbijetesë, dhe si mënyra më efikase për të penguar sulme të ardhshme.
Kësisoj, ndonëse programi bërthamor ka marrë një goditje të fortë, rreziku që Irani të përpiqet sërish të ndërtojë një armë bërthamore nuk mund të përjashtohet.
Kombinimi i objekteve të fshehura, rezistencës së sistemit dhe përgatitjes së stafit shkencor e bëjnë sfidues përpjekjen për ta shkatërruar plotësisht këtë program.
Në fund, në mungesë të një ndryshimi regjimi ose një aksioni tokësor të konfirmuar, mbetet e paqartë nëse kapaciteti bërthamor i Iranit është ndalur përfundimisht apo vetëm është shtyrë për më vonë.
