Mjaftoi vetëm një orë breshër pasditen e së enjtes për t’u shkaktuar dëme masive fermerëve në rrethin e Devollit. Fshati Dobranj është goditur më së shumti, ku kultura kryesore e zonës, fasulja, e cila ndodhej në fazën e vjeljes, është shkatërruar në masë.
Dhjetëra fermerë të këtij fshati raportojnë se nuk do të arrijnë të vjelin as 20% të prodhimit të pritshëm, ndërsa dëmet financiare llogariten në miliona lekë. Sipas të dhënave të para, vetëm në Dobranj numërohen të paktën 50 fermerë të dëmtuar drejtpërdrejt, por breshëri nuk ka kursyer as kulturat e tjera bujqësore.
Nga verifikimet dhe inspektimet e kryera në terren nga Bashkia Devoll në fshatrat e prekur, Dobranj dhe Braçanj:
- Sipërfaqja e dëmtuar: Janë konstatuar rreth 40 hektarë sipërfaqe bujqësore të prekura nga stuhia e breshërit.
- Kultura më e goditur: Fasulja mbetet më e dëmtuara, ku vetëm në Dobranj numërohen 30 hektarë të goditur, me një shkallë dëmtimi nga 50% deri në 60%.
- Kultura të tjera të prekura: Dëmtime serioze janë evidentuar gjithashtu në pemëtari dhe perime, specifikisht në parcelat e mbjella me mollë, qepë dhe produkte të tjera të stinës.
Fermerët e zonës kërkojnë ndërhyrjen e menjëhershme të strukturave përkatëse dhe grupeve të vlerësimit të dëmeve për t’u ardhur në ndihmë me dëmshpërblime financiare pas kësaj goditjeje të rëndë natyrore.
