Partia Demokratike ka bërë sot një denoncim publik ndaj Presidentit të Republikës, duke pretenduar se ai rezulton i punësuar në rrjetin e klinikave private “Acibadem” edhe gjatë ushtrimit të mandatit si Kreu i Shtetit.
Sipas opozitës, një situatë e tillë përbën shkelje të ndalimit kushtetues, që parashikon se Presidenti nuk mund të ushtrojë asnjë funksion tjetër publik apo privat gjatë mandatit të tij.
Në deklaratën për mediat, PD tha se Presidenti “paradite punon si kreu i shtetit dhe pasdite si mjek”, duke e cilësuar këtë si një rast të paprecedent në historinë e republikës. Opozita theksoi se të ardhurat e deklaruara nga rrjeti i klinikave “Acibadem” përbëjnë konflikt interesi dhe cenim të pavarësisë së institucionit të Presidentit.
PD njoftoi gjithashtu se ka nisur procedurat për shkarkimin e Presidentit, duke kërkuar që Kuvendi të verifikojë ligjërisht situatën dhe të vlerësojë nëse janë plotësuar kushtet për shkelje të Kushtetutës.
Derisa institucionet përkatëse të shprehen, ky mbetet një pretendim politik i opozitës, që pritet të ngjallë debat në ditët në vijim.
