Deputeti i zgjedhur i Partisë Demokratike, Belind Këlliçi, ka dalë ditën e sotme në një deklaratë për mediat nga ku ka denoncuar një tjetër rast, sipas tyre, të korrupsionit me tenderët.
Sipas Këlliçit, kryeministri Rama ka shpërblyer së fundmi me dy tenderë ish-kryetarin e Bashkisë së Vorës, Agim Kajmakun, i cili humbi mandatin e tij, sepse shkeli ligjin e dekriminalizimit dhe ndërsa ishte në arrati, mes viteve 2019-2020, fitonte miliona lekë tenderë.
“Ndëshkimi i modelit të ndërtuar nga Edi Rama është e vetmja rrugë që Shqipëria të çlirohet nga korrupsioni dhe t’u kthehet sa më parë shqiptarëve,” tha deputeti i zgjedhur, Belind Këlliçi.
Deklarata e plotë e Belind Këlliçit:
Ndoqëm përpjekjen e radhës të Edi Ramës për t’u hedhur hi syve qytetarëve shqiptarë, me propagandën e gënjeshtërt dhe hipokrite përballë të emëruarve të tij në pushtetin vendor.
Por tashmë shumica dërrmuese e qytetarëve e dinë mirë se ajo që Rama bën dhe ajo që Rama thotë, nuk kanë lidhje me njëra-tjetrën.
Sot Partia Demokratike do të sjellë një provë për të dëshmuar edhe një herë, se sevdaja e madhe e Ramës për antikorrupsionin është një lojë që konsumohet para kamerave, ndërsa kur ato shuhen vazhdon vjedhjen e taksave të shqiptarëve me bandën e tij të plaçkitësve.
Të gjithë e mbani mend Agim Kajmakun.
Të emëruarin nga Edi Rama në krye të Bashkisë së Vorës, që humbi mandatin sepse shkeli ligjin e dekriminalizimit dhe ndërsa ishte në arrati, midis viteve 2019 dhe 2020, fitonte miliona lekë tenderë.
Sot Agim Kajmaku vazhdon të shpërblehet nga Edi Rama.
AME 2020 sh.p.k., në pronësi të Kajmakut, ka përfituar 2 tenderë. Një nga OSHEE sh.a me objekt “Mirëmbajtje e ambienteve të brendshme dhe tarracës për OSHEE Group sh.a dhe për Drejtorinë Rajonale Tiranë / OSSH sh.a”, me vlerë 61,136 euro. Oferta më e lartë!
Dhe një tjetër nga Bashkia Fier me objekt “Blerje lule dekorative”, me vlerë 16,279 euro. Edhe ky tender me ofertën më të lartë!
Ky pra është Edi Rama i vërtetë. Ai që para kamerave qan për taksat e qytetarëve, dhe pas kamerave i përdorë ato për të shpërblyer ata me të cilët ka kryer masakrën zgjedhore të 25 prillit.
Korrupsioni dhe bashkëpunimi me krimin janë modeli me të cilin Edi Rama ka shkaktuar rrënimin e përditshëm të ekonomisë së çdo familje, duke nxitur largimin masiv e të rinjve shqiptarë.
Ndëshkimi i modelit të ndërtuar nga Edi Rama është e vetmja rrugë që Shqipëria të çlirohet nga korrupsioni dhe t’u kthehet sa më parë shqiptarëve.
