Të tjera detaje tronditëse kanë dalë në dritë në lidhje me vrasjen e 20-vjeçarit Johan Zuko, ngjarje e ndodhur pasditen e sotme në qytetin e Korçës.
Burime nga grupi hetimor bëjnë me dije se i riu ka ndërruar jetë si pasojë e një plumbi të vetëm, i cili ka rezultuar fatal për jetën e tij.
Sipas të dhënave të deritanishme, autori i dyshuar e ka goditur 20-vjeçarin me armë zjarri të llojit “Kallashnikov” nga mbrapa, teksa i riu po ngjiste shkallët e pallatit. Plumbi e ka kapur viktimën në pjesën e poshtme të shpatullës dhe i ka dalë nga ana tjetër e trupit, duke i shkaktuar plagë të menjëhershme vdekjeprurëse.
E gjithë ngjarja e rëndë ka ndodhur në katin e tretë të një pallati në rrugën “Viktor Eftimiu”, në lagjen nr. 15 të qytetit.
Grupi hetimor vijon punën në vendngjarje për dokumentimin e plotë të kësaj ngjarjeje, ndërsa forcat e policisë janë vënë në ndjekje të autorit të dyshuar, i cili është larguar nga skena e krimit menjëherë pas të shtënave.
