Djali i zyrtarit socialist në takimin e Ramës me “studentët protestues”

Djali i zyrtarit socialist në takimin e…

Takimi i kryeministrit Edi Rama me një grup të rinjsh në Pallatin e Brigadave, të prezantuar prej tij si studentë protestues që kërkojnë dialog, ka ngritur pikëpyetje mbi identitetin dhe përfaqësimin e pjesëmarrësve. Pas fotografisë së publikuar mbrëmjen e 20 nëntorit dhe videos së shpërndarë ditën e sotme, një detaj ka tërhequr veçanërisht vëmendjen.

Mes të rinjve që u takuan me Ramën rezulton të ketë qenë edhe Mateo Seferi, djali i nënkryetarit të Bashkisë së Tiranës, Andi Seferi. Ka qenë vetë ky i fundit që, përmes një postimi në rrjetet sociale, ka publikuar momentin kur i biri shtrëngon dorën me kryeministrin. Ndërkohë, nëna e Mateos, Denada Seferi, mban postin e zëvendësministres së Shëndetësisë dhe Mirëqenies Sociale.

Ky zhvillim ka shtuar diskutimet rreth takimit, veçanërisht në një kohë kur studentë të përfshirë në protesta kanë refuzuar vazhdimisht ftesat e Ramës për dialog. Madje, përfaqësues të protestës kanë deklaruar publikisht se të rinjtë që u takuan me kryeministrin nuk i përfaqësojnë ata. Prania e djalit të dy zyrtarëve të lartë shtetërorë ngre pyetje të mëtejshme mbi mënyrën se si janë përzgjedhur pjesëmarrësit.

Nga ana tjetër, Rama e ka cilësuar takimin si një dialog inkurajues me studentë që besojnë te protesta pa dhunë. Megjithatë, deri tani nuk është bërë publike lista e plotë e pjesëmarrësve dhe as përmbajtja e diskutimeve. Lidhjet familjare të njërit prej të pranishmëve me administratën nuk provojnë se takimi ishte i organizuar politikisht, por e bëjnë edhe më të rëndësishëm sqarimin se kë përfaqësonin realisht të rinjtë e ulur në tryezë me kryeministrin.

Më Të Klikuarat


Lajmet e fundit