Një qytetar ka denoncuar në redaksinë tonë një situatë problematike në Drejtorinë e Përgjithshme të Shërbimeve të Transportit Rrugor (DPSHTRR) në Durrës, ku, sipas tij, prej ditës së premte qytetarët nuk po marrin shërbimet për shkak të mungesës së internetit.
Sipas denoncimit, problemi me sistemin dhe lidhjen e internetit ka vijuar prej disa ditësh, duke sjellë pengesa për qytetarët që paraqiten pranë institucionit për të kryer procedurat e tyre.
Qytetari shprehet se gjatë këtyre ditëve u është thënë vazhdimisht se problemi do të zgjidhej brenda një kohe të shkurtër, por shërbimi nuk është rikthyer.
“Ju lutem postojeni. DPSHTRR Durrës ka që të premten pa shërbim për qytetarët, pa internet. Kanë që të premten me mashtrime: ‘do vijë për gjysmë ore’, ‘do vijë për gjysmë ore’”, thuhet në denoncimin e qytetarit.
Situata ka krijuar shqetësim dhe pritje për qytetarët, të cilët nuk kanë mundur të përfundojnë procedurat e nevojshme pranë institucionit.
Deri në një reagim zyrtar nga DPSHTRR Durrës, mbetet e paqartë se çfarë e ka shkaktuar problemin me internetin, përse shërbimi nuk është rikthyer prej ditës së premte dhe se kur pritet të normalizohet situata.
Qytetarët kërkojnë një zgjidhje sa më të shpejtë dhe informacion të qartë nga institucioni për rikthimin e shërbimeve.
