Një skenë që duket si e marrë nga një film fantastiko-shkencor është zhvilluar në një ring, ku influencuesi Frankie LaPenna u përball me një robot humanoid që ngjante me personazhin “Terminator”. Përballja u organizua nga kompania amerikane e robotikës REK, si pjesë e një koncepti të ri ku njerëzit kontrollojnë robotë humanoidë dhe i përballin në duele të kontrolluara.
Në videon e publikuar nga kompania, roboti rreth 1.83 metra i gjatë hyri në ring dhe u përgatit për ndeshjen si një sportist profesionist. Pas nisjes së përballjes, LaPenna dhe roboti shkëmbyen grushte dhe shqelma. Influencuesi arriti ta godiste disa herë robotin, ndërsa goditjet me këmbë të këtij të fundit e shtynë atë në anën tjetër të kafazit në disa raste.
REK e cilësoi përballjen si “betejën e parë Njeri kundër Robotit Terminator” dhe publikoi pamjet në rrjetet sociale, duke paralajmëruar edhe pjesë të tjera të ndeshjes. Në përgjigje të një komenti, kompania sqaroi se LaPenna në fund arriti ta mposhtë robotin. Përballja u prezantua si një demonstrim i teknologjisë së robotëve humanoidë dhe i mundësive për përdorimin e tyre në argëtim dhe gara të kontrolluara.
