Ishte prej shumë muajsh në arrati, por sot policia ka arritur ta vërë në pranga.
Bëhet fjalë për Artur Terziun, 44 vjeç, pronarin e një lokali në Durrës të njohur si “Baron’s”.
Terziu për shkak të papërgjegjshmërisë së tij dhe makutërisë për të zgjeruar lokalin, bëri që të shembej një pallat i tërë më 26 nëntor 2019 në Durrës.
Më shumë se sa tërmeti i fuqishëm, ishin ndërhyrjet që Terziu kishte bërë në kolonat dhe themelet e pallatit 6-katësh, të cilat sollën dëmtimin e pariparueshëm të ndërtesës.
Policia e ka ndaluar pronarin e lokalit në Durrës, punimet në të cilin sollën edhe shembjen e pallatit 6-katësh, ku humbën jetën disa persona.
Njoftimi i Policisë së Durrësit:
Kishte bërë ndërhyrje në biznesin e tij lokal dhe për pasojë u shemb pallati 6-katësh nga tërmeti i datës 26.11.2019.
Policia e Durrësit ndalon pronarin e lokalit ‘Barons’, i cili ishte i shpallur në kërkim për veprën penale ‘Vrasja në rrethana të tjera cilësuese’.
Specialistët për Hetimin e Krimeve në Komisariatin e Policisë Durrës ekzekutuan urdhrin e ndalimit për shtetasin A. T., 44 vjeç, banues në Durrës.
Për këtë shtetas, Gjykata e Shkallës së Parë Durrës ka caktuar masën e sigurisë ‘Arrest në burg’.
Pasi dyshohet se, nga ndërhyrjet që ka bërë në biznesin e tij lokal, në lagjen nr. 6 dhe nga tërmeti i datës 26.11.2019 është shembur pallati 6-katësh.
Si pasojë humbën jetën 2 shtetase.
Materialet i kaluan Prokurorisë së Rrethit Gjyqësor Durrës, për veprime të mëtejshme./Gazetaatdheu.com/
