Shqipëria e ka nisur në mënyrën më të mirë aventurën në Ligën e Kombeve, duke mposhtur 2-0 Bjellorusinë në stadiumin “Air Albania”.
Kuqezinjtë e nisën takimin me intensitet dhe iu afruan golit me Rei Manajn, ndërsa pak minuta më vonë ishte Etrit Berisha ai që mbajti në lojë Shqipërinë me një ndërhyrje vendimtare.
Goli i avantazhit erdhi rreth çerek ore para përfundimit të pjesës së parë. Gjimshiti fitoi një 11-metërsh pas një kontakti brenda zonës dhe Kristjan Asllani u tregua i saktë nga pika e bardhë, duke kaluar Shqipërinë në epërsi.
Kuqezinjtë nuk u mjaftuan me kaq. Para se skuadrat të shkonin në dhomat e zhveshjes, Ernest Muçi dyfishoi shifrat pas një aksioni të bukur dhe asistit të Elseid Hysajt.
Në fraksionin e dytë, Shqipëria pati mundësi të tjera për të thelluar avantazhin, me Taulant Seferin që humbi një rast të artë për golin e tretë. Bjellorusia provoi të reagonte, por nuk arriti të krijonte rrezik serioz për portën kuqezi.
Me këtë sukses, Shqipëria e nis me tri pikë aventurën në Ligën e Kombeve, ndërsa sfida e radhës do të jetë ndaj San Marinos, tre ditë më vonë.
