Një taksist është grabitur në qytetin e Lezhës, ndërsa policia ka nisur hetimet për identifikimin dhe kapjen e autorëve. Ngjarja është denoncuar nga vetë viktima, i cili ka deklaruar se është sulmuar nga dy persona.
Sipas dëshmisë së taksistit, dy autorët i kanë zënë pritë dhe, pasi e kanë dhunuar, i kanë marrë sendet personale si dhe një shumë parash. Pas ngjarjes, policia ka mbledhur provat e para dhe ka nisur punën për zbardhjen e plotë të rastit.
Grupi hetimor po këqyr pamjet e kamerave të sigurisë në zonë, me qëllim identifikimin e personave të dyshuar. Ndërkohë, vijojnë veprimet hetimore për të përcaktuar rrethanat e sakta të grabitjes dhe për të dokumentuar përgjegjësinë e autorëve.
