Policia greke ka arrestuar tre persona, dy shqiptarë dhe një grek, të dyshuar për përfshirjen në një sulm të dhunshëm ndaj një shtetasi indian në qytetin e Thivës. Ngjarja ka ndodhur në orët e para të së shtunës, ndërsa autoritetet kanë nisur hetimet për të zbardhur rrethanat dhe motivin e konfliktit.
Sipas raportimeve të mediave greke, incidenti ka ndodhur rreth orës 06:00 në rrugën Dirkis. Tre të dyshuarit dyshohet se kanë sulmuar fizikisht viktimën, e cila pas goditjeve është larguar nga vendi i ngjarjes, duke tentuar të kërkojë ndihmë.
Por sulmi nuk ka përfunduar aty. Të dyshuarit dyshohet se e kanë ndjekur dhe kanë vijuar ta godasin edhe në një tjetër pjesë të qytetit. Policia ka ndërhyrë duke bërë arrestimin e dy shqiptarëve dhe shtetasit grek, ndërsa vijojnë procedurat hetimore për përcaktimin e përgjegjësive dhe rrethanave të plota të ngjarjes.
