Dy vrasje brenda pak orësh në Shkodër dhe Kurbin janë një tjetër kambanë alarmi për sigurinë në vend. Ndërsa qytetarët përballen me frikën e krimit, konfliktet e vjetra dhe hakmarrjet që përfundojnë me viktima, një pyetje po bëhet gjithnjë e më e fortë, ku duhet të jetë fokusi i Policisë së Shtetit? Në rrugët dhe lagjet ku rrezikohet jeta e njerëzve, apo te komentet dhe review-t negative në internet?
Në një kohë kur krimi i rëndë duket se po sfidon institucionet, angazhimi i policisë në hetimin e ankesave online ndaj bizneseve të lidhur me Ramën ka ngritur pikëpyetje të mëdha. Bizneset mund të mbrojnë reputacionin e tyre me mjete të tjera, por qytetarët nuk mund të presin që policia të humbasë energji te komentet virtuale, ndërsa vrasjet, dhuna dhe kërcënimet vazhdojnë të jenë një realitet i hidhur. Misioni i policisë nuk është të mbrojë imazhin e bizneseve në internet, por jetën dhe sigurinë e qytetarëve.
Sot sfida më e madhe nuk është një review negativ, por një kriminel që lëviz i lirë, një konflikt që nuk parandalohet dhe një jetë që humbet. Një polici e fortë matet me aftësinë për të ndaluar tragjeditë përpara se të ndodhin, për të njohur problemet e komuniteteve dhe për të rikthyer besimin e qytetarëve. Në një vend ku krimi godet pa paralajmërim, prioriteti duhet të jetë gjithmonë siguria e njerëzve, jo menaxhimi i kritikave në rrjet.
