Sedat Peker, është një prej personave më të kërkuar të momentit në Turqi, i cili dyshohet se fshihet në vendet e ballkanit, i dyshuar për vepra penale të rënda, përfshirë edhe vrasjen. Mbrëmjen e djeshme i ftuar në emisionin Opinion, gazetari Artan Hoxha tha se kishte informacione se Peker streohej në Vlorë, e madje e kishte parë atë teksa lëvizte me një eskortë prej 5 makinash, po duket se polemika të mëdha ka dhe në Maqedoni.
Vetë Peker është shprehur se jo vetëm që e njeh kryeministrin maqedonas Zoran Zaev, por ka qenë dhe për vizitë në shtëpinë e tij, një deklaratë kjo që po shkakton tërmet politik në vendin fqinj. “Unë Sedat Peker, kryeministrin e atij shteti e njoh, kam qenë mysafir në shtëpinë e tij në Maqedoni. Edhe liderët e tjerë të të gjitha partive i njoh”, tha Sedat Peker.
Vetë Zaev nuk ka pranuar të bëjë asnjë koment për mediat, ndërsa nga qeveria maqedonase është thënë shkurt se kryeministri nuk ka pasur takim me të.
Ndërkohë para një muaji, Zaev kishte pohuar se kolegët e tij politikan janë takuar me atë.
“Jam i njoftuar edhe secili nga kolegët nga partitë partnere ka pasur takim pas kërkesës së tij, në çarshi dhe vende të tjera, por absolutisht askush nuk mund të thotë se dikush ka faj për këtë sepse normalisht kur dikush kërkon takim, dikush duhet të caktojë takimin. Siç shihni, institucionet funksionojnë dhe kanë dhënë rezultat”, deklaroi Zoran Zaev, kryeministër.
Për pohimet e Peker se njihet me kryeministrin Zaev, ka reaguar lideri i opozitës në Maqedoni Hristijan Mickoski. Ai hedh dyshime mbi përfshirjen e Zaev në rastin me pasaportat false.
“Pse të dënuarit janë gjykuar vetëm për keqpërdorim të detyrës dhe nenin 353, dhe jo për falsifikim të dokumenteve të udhëtimit, ose për grup të organizuar kriminal dhe pse nuk ka hetim financiar? Përgjigja për të gjitha këto vijon në video, Sedat Peker thotë se ai u takua me kryeministrin Zaev në shtëpinë e tij”, shkruan Hristijan Mickoski, lider i VMRO-DPMNE-së.
Sedat Pekerin kërkohet në Turqi për vrasje dhe për trafikim të drogës. Në 18 janar 2021, policia e Maqedonisë së Veriut e arrestoi për shkak se kishte shkelur rregullat për qëndrim të shkurtër dhe e dëboi nga vendi, ndërkohë që më pas ai dyshohet se strehohet në Shqipëri.
Çfarë tha mbrëmjen e djeshme gazetari Hoxha:
“Sedat Peker është cilësuar si një nga bosët më të mëdhenj të mafies turke që kërkohet në Shqipëri. Ka qenë në burg nga 2004-2014. Ka kryer 10 nga 15 vjet. Në 2015 ka drejtuar një organizatë që ka një aktivitet të shtrirë në Turqi, vrasje, rrëmbime, gjoba. Në 2015 është parë në takim me Erdogan.
I kam siguruar ato foto. 2015-2018 ka qenë mbështetës i Erdoganit, me qendrime publike, me statuse në facebook. Ka 1.6 milionë ndjekës aty, ka shumë në Instagram dhe tëitter, është shumë i mediatizuar. Pas 2018 ka pasur përplasje publike me Erdogan dhe ka filluar operacioni i policisë turke.
U kapën 49 anëtarë të grupit ët tij, por jo ky. Kan qendruar në Mal të Zi, Kosovë dhe Maqedoni. Në Prizren ka hapur biznes. Ka takuar kryetarët e pakicave turke në Maqedoni dhe Kosovë. Është një bos që fshihet mbas nacionalizmit.
Në Maqedoni është arrestuar në fillim të këtij viti se kishte kaluar lejen e qendrimit 90 ditë e kanë çuar në Kosovë dhe jo në Turqi. Ministria ka thënë se ai nuk ka pasaportë kosovare, por ka leje qendrimi sepse ka biznes atje.
Në 20 janar ka hyrë këtu. Lëviz me eskortë, e kam parë në Vlorë me 5 makina. Ky ka lëvizur në Vlorë, në shkurt. Sot kërkova që nëse ka në TIMS dhe rezulton që nuk ka hyrë. Më rezulton që në Maqedoni ka marrë pasaportë me identitet fals në Maqedoni. Me atë pasaportë të ketë hyrë këtu dhe të ketë ikur në Mal të Zi”.
