Një efektiv policie në Kosovë, është arrestuar pas publikimit të një videoje në mendiat kosovare, ndërkohë që dhunonte një 18-vjeçar.
Sipas informacioneve, bëhet fjalë për Haris Kelmendin, pjesëtar i Njësisë së Reagimit të Shpejtë në stacionin policor “Qendra” në Prishtinë.
Ngjarja ka ndodhur në vitin 2018, vepër kjo për të cilën është bërë publike vetëm kohët e fundit.
Mediat kosovare shkruajnë se 18-vjeçari ishte ndaluar nga Policia për kundërvajtje në trafik. Më pas u keqtrajtua nga Haris Kelmendi në stacionin policor nën prezencën e kolegëve të tij.
Pas torturës që përjetoi viktima, iu drejtua IPK-së, duke provuar që ta bindë këtë institucion që zyrtari policor të ndiqet penalisht. Kërkesa e tij u refuzua për mungesë provash.
Dy vjet më pas kjo ngjarje u vërtetua vetë nga telefoni i policit, i cili e kishte shpërndarë këtë video tek kolegët e tij.
Kelmendi e kishte dërguar videon edhe tek një person që policia ia kishte sekuestruar telefonin në kuadër të një operacioni.
Më skandaloze është edhe fakti që polici e kishte shpërndarë videon e keqtrajtimit edhe te dhjetëra zyrtarë policie, por asnjëri nuk ka reaguar.
Viktima u bë objekt talljeje për efektivët e policisë. Pamjet janë siguruar nga gazeta kosovare Sinjali.
