Në vendin tonë ka plot atentate të frikshme dhe të rënda të cilët ende nuk janë zbardhur, teksa kjo temë është trajtuar në emisionin ‘Në Shënjestër’, ku për herë të parë, u publikuan të dhëna për ngjarjen që tronditi Tiranën në 20 qershorin e 2020, atë të vrasjes së Hekuran Billës.
Eksperti i kriminalistikës, Ervin Karamuço u shpreh se grupet kriminale i zbardhin ngjarjet më shpejt sesa policia, ndërsa theksoi se këto grupe kanë edhe sallë operative. Ndër të tjera, Karamuço tha se policia duhet të ndjekë një strategji tjetër për gjurmimin e rasteve të tilla.
Ervin Karamuço
Në momentin që u arrestua ajo vajza, për çfarë u arrestua, për 2 mesazhe?! Deri këtu s’kemi prova. Mund të ketë dyshim, por s’është i arsyeshëm. Mund të jetë premtuar një shpërblim, a u mor ky shpërblim apo jo, si ka mundësi që digjet kjo? Atëherë lind dyshimi se po e fshin gjurmët sepse je i paaftë, ose sepse je paguar për të mos e vazhduar më tej këtë çështje. Ne kemi 30 vite me një dualizëm, kur nuk funksionon shteti ligjor do të vijojë Kanuni. Kjo ka 30 vite që ndodh në Shqipëri. Ne e kemi parë këtë. Disa organizata kriminale kanë salla operative, e këta mbledhin informacion më shpejt se kush e kreu vrasjen se sa organet ligjzbatuese.