Atentati më tritol në Shkozet nuk ishte i pari për Aldi Mustafën. Ndaj 37-vjeçarit vite më parë ishte tentuar sërish eleminimi fizik i tij. Në vitin 2012 ai i shpëtoi një atentati në qytetin e Kavajës. Jo pak por 120 plumba u zbrazën në drejtim të tij, ku 12 prej tyre e kapën në pjesë të ndryshme të trupit.
Fati ishte me të pasi ai i shpëtoi mrekullisht këtij atentati, por humbi shokun e tij të ngushtë. Hasmërit kanë vijuar për 37-vjeçarin që këtë herë u tentua të eleminohej me eksploziv të vendosur në makinë.
Për atentatin fundit policia ka shoqëruar 8 persona të cilët dyshohet se mund të jenë të lidhur ose kanë informacione për ngjarjen. Policia ka bindjen se katër nga të ndaluarit mund të jenë edhe autorët e atentatit të së hënës në Shkozet. Përpara hetuesve Aldi Mustafa nuk ka dhënë emra kundërshtarësh duke thënë se nuk ka konflikte me asnjë person.
Aldi Mustafa njihet për lidhjet e tij me bandat dhe miqësinë me Aleksandër Lahon ose i njohur ndryshe si “Rrumi” i Shijakut. Ky i fundit një nga personat më të përfolur për ngjarjet kriminale, përfshirë edhe atentatin ndaj ish-prokurorit, Arjan Ndoj. Ndërkohë Muftafa në gusht të vitit 2021 ra në prangat e policisë si një nga 3 personat që kishte planifikuar një vrasje në Durrës, kundrejt pagesës. Më parë ai është dënuar me 10 vite burg për veprat penale, “Kanosja” dhe “Prodhim dhe shitje të narkotikëve”.