Elon Musk-u e quan projektligjin e ri të Senatit një kërcënim për punësimin dhe zhvillimin ekonomik të SHBA-së, duke e cilësuar si dëm strategjik për vendin.
Miliarderi Elon Musk ka rinovuar kritikat e ashpra ndaj projektligjit të ri për taksat dhe shpenzimet, të cilin presidenti Donald Trump po përpiqet ta kalojë përmes Senatit përpara 4 Korrikut. Në një postim të bërë të shtunën në platformën X, Musk-u paralajmëroi se versioni i fundit i këtij projektligji mund të sjellë humbjen e miliona vendeve të punës dhe të dëmtojë rëndë sektorët ekonomikë më të avancuar të vendit.
Sipas tij, projektligji i gjatë afro 1.000 faqe mbështet industri të tejkaluara, ndërkohë që penalizon teknologjitë dhe iniciativat e së ardhmes. “Ky është një vetëvrasje politike për Partinë Republikane,” shkroi Musk-u, duke e shoqëruar reagimin e tij me kritika të mëtejshme për drejtuesit e Senatit që po bëjnë përpjekje për të siguruar votat e nevojshme.
Ky reagim rikthen përplasjen e hapur që Musk-u ka pasur me administratën Trump dhe përfaqësuesit e saj, disa javë pasi ai u largua nga pozicioni si drejtues i një departamenti të qeverisë për efiçiencën administrative. Pas largimit, ai kishte kritikuar projektligjin si “plot me favore të turpshme” dhe e kishte cilësuar si një “turp kombëtar”.
Në postime të mëparshme, Musk-u kishte sulmuar ashpër edhe ligjvënësit republikanë që mbështetën këtë nismë, duke i akuzuar për “tradhti ndaj popullit amerikan”. Ai kishte kërcënuar gjithashtu se do të tërhiqte mbështetjen politike dhe financiare për çdo kandidat që votonte pro paketës fiskale të Trump-it.
Përplasja mes Musk-ut dhe Trump-it eskaloi edhe më tej kur ky i fundit u shpreh i zhgënjyer nga kritikat, ndërsa Musk-u u kundërpërgjigj me insinuata të rënda, duke përmendur emrin e Trump-it në kontekstin e dosjeve që lidhen me Jeffrey Epstein-in – pa ofruar prova konkrete. Edhe pse më pas miliarderi kërkoi falje për disa nga komentet e tij, marrëdhënia mes tyre mbeti e lëkundur.
Ndërkohë, Trump-i ka zgjedhur të mos komentojë publikisht për deklaratat e fundit të Musk-ut. Megjithatë, ai i është rikthyer sulmeve ndaj senatorëve republikanë që nuk mbështetën projektligjin, duke kërcënuar se do të punojë kundër rizgjedhjes së tyre. Një ndër ta ishte senatori Thom Tillis nga Karolina e Veriut, i cili u përmend drejtpërdrejt për “kërkim vëmendjeje”.
Projektligji u pranua me vështirësi në një votim procedural të mbajtur të shtunën mbrëma, duke i hapur rrugë debatit të mëtejshëm në Senat. Musk-u, edhe pse i larguar nga politika aktive, mbetet një figurë me ndikim të madh përmes pasurisë së tij, e cila në zgjedhjet e vitit 2024 ndihmoi ndjeshëm fushatën e Trumpit.
Nuk dihet ende se sa ndikim do të ketë qëndrimi i tij i fundit në procesin politik aktual, por ajo që është e qartë është se kritikat e hapura nga një figurë si Musk-u e vendosin administratën republikane në një pozitë edhe më të vështirë për të përmbushur afatin e vendosur nga Trump-i.
