Stuhi të fuqishme kanë goditur Turqinë, teksa bilanci i të plagosurve dhe viktimave është rritur. Sipas reuters, mësohet se për shkak të motit të keq me erëra ekstreme deri në 130 km në orë, në Stamboll, kanë ndërruar jetë 4 persona, ndërsa janë plagosur 19 të tjerë. Ndërkohë sipas zyrës së guvernatorit, mes viktimave ishte edhe një shtetas i huaj, ndërsa paralajmëroi se erërat e forta do të vazhdojnë edhe të martën. Në disa provinca të Izmirit, Kocaelit dhe Bursës deti vërshoi dhe çatitë u hoqën nga majat e ndërtesave si pasojë e erërave të forta. Në pamje e transmetuara shihen këmbësorë duke u shpëtuar nga mbeturinat që fluturojnë nga era. Agjencia turke e motit lëshoi një paralajmërim për stuhi të nivelit portokalli për 17 provinca, i dyti më i larti nga katër nivelet e rrezikut dhe një alarm i verdhë, niveli i tretë më i lartë i rrezikut, për 35 provinca. Kompania ajrore turke, Turkish Airlines, ka ndërprerë fluturimet, teksa Bosfori është mbyllur..
