Një familje mafioze shqiptare në Itali, e dyshuar për trafik ndërkombëtar droge, ka investuar miliona euro në pasuri të paluajtshme në Verona përmes një skeme të sofistikuar pastrimi parash.
Autoritetet italiane dhe shqiptare kanë ndërmarrë një operacion të përbashkët, duke goditur një rrjet kriminal që dyshohet se ka riinvestuar fitime të mëdha nga trafiku i drogës në Itali. Hetimi ka rezultuar me sekuestrimin e pasurive që kapin vlerën e afro 4 milionë eurosh në provincën e Veronës.
Guardia di Finanza në Verona, në bashkëpunim me Byronë Kombëtare të Hetimit në Shqipëri, kanë identifikuar një familje shqiptare që dyshohet se ka përdorur një rrjet të mirëorganizuar për të futur në qarkullim të ligjshëm të ardhurat nga aktiviteti kriminal. Paratë janë përdorur për të blerë prona dhe aksione biznesesh në territorin italian.
Gjykata e Veronës ka dhënë një urdhër sekuestrimi për pasuri të paluajtshme, pjesëmarrje në shoqëri tregtare dhe asete financiare që lidhen me këtë familje shqiptare. Ekzekutimi i këtij urdhri është kryer në orët e para të mëngjesit, në një aksion të shpejtë dhe të koordinuar mes dy shteteve.
Autoritetet theksuan se ky është një ndër rastet e para ku vërtetohet rikthimi i parave të pista të mafies shqiptare nga jashtë në një vend të BE-së, në këtë rast në Itali, përmes investimeve të strukturuara në ekonomi. Ky fakt tregon sofistikimin e metodave të reja që përdorin grupet kriminale.
Më shumë informacione mbi këtë operacion pritet të publikohen në një konferencë shtypi që do të zhvillohet përmes një lidhjeje video. Në këtë komunikim do të marrin pjesë Kryeprokurori i Veronës, Raffaele Tito, kreu i SPAK-ut, Altin Dumani, dhe përfaqësues të Guardia di Finanza.
Ky rast konsiderohet një sinjal alarmi për autoritetet evropiane, pasi tregon jo vetëm rritjen e fuqisë financiare të grupeve kriminale shqiptare, por edhe aftësinë e tyre për të depërtuar në tregjet legale përmes skemave të avancuara pastrimi parash.
