Një punonjës policie, i cili ndodhej jashtë shërbimit, është dhunuar mbrëmjen e kaluar në Krujë. 19-vjeçari, pjesë e Patrullës së Policisë, dyshohet se është goditur nga persona të maskuar, që kanë përdorur edhe një shkop bejsbolli.
Sipas të dhënave paraprake, autorët e dyshuar janë vëllezërit e një vajze nën 18 vjeç, me të cilën polici kishte komunikuar përmes Instagramit. Dyshohet se komunikimi mes tyre ka qenë shkak për konfliktin dhe se familjarët e vajzës nuk e kanë pranuar atë.
Pas kallëzimit të ngjarjes, policia ka nisur hetimet për identifikimin dhe kapjen e autorëve. Përmes pamjeve të kamerave të sigurisë, efektivët kanë mundur të identifikojnë automjetin me të cilin lëviznin personat e dyshuar, ndërsa vijojnë verifikimet për zbardhjen e plotë të rrethanave.
