Franca ka vendosur të ndalojë pirjen e duhanit në të gjitha vendet publike, duke shënuar një hap të rëndësishëm drejt mbrojtjes së shëndetit publik. Vendimi do të hyjë në fuqi më 1 korrik dhe do të përfshijë plazhet, parqet, kopshtet publike, ambientet përreth shkollave, stacionet e autobusëve si dhe hapësirat sportive.
“Duhani duhet të ndalohet aty ku ka fëmijë,” deklaroi ministrja e Shëndetësisë dhe Familjes, Catherine Vautrin. “Liria për të pirë duhan përfundon aty ku nis e drejta e fëmijëve për të marrë frymë në ajër të pastër,” shtoi ajo, duke theksuar rëndësinë e ruajtjes së ambientit nga ndotja e duhanit.
Megjithatë, ndalimi nuk do të përfshijë zonat e jashtme të kafeneve dhe bareve, të njohura si tarraca. Çdo shkelje e këtij rregulli do të ndëshkohet me një gjobë prej 135 eurosh.
Cigaret elektronike aktualisht përjashtohen nga ky ndalim, por ministrja bëri të ditur se janë në shqyrtim kufizime të reja për sasinë e nikotinës që ato përmbajnë.
Sipas të dhënave nga Qendra Franceze për Monitorimin e Drogave dhe Varësisë, vetëm 23.1% e francezëve konsumojnë duhan çdo ditë – niveli më i ulët i regjistruar ndonjëherë – duke shënuar një rënie me mbi pesë pikë përqindjeje që nga viti 2014. Komiteti Kombëtar Kundër Duhanpirjes raporton se mbi 75,000 persona humbin jetën çdo vit në Francë nga sëmundje që lidhen me duhanin. Ndërkohë, ndalimi i pirjes së duhanit në hapësira të brendshme publike si restorante dhe klube nate është në fuqi që prej vitit 2008.
