Shefi i ri i NATO-s, Mark Rutte, ka dhënë një paralajmërim tronditës, duke ngritur shqetësime serioze se bota mund të përfshihet në një konflikt global shkatërrimtar, nëse Kina dhe Rusia ndërmarrin një ofensivë të përbashkët ushtarake.
Në një intervistë për New York Times, Rutte u shpreh se lideri kinez Xi Jinping mund të tentojë pushtimin e Tajvanit, ndërsa në të njëjtën kohë mund të kërkojë nga Vladimir Putin që të sulmojë territorin e NATO-s në Europë, për të shpërqendruar Perëndimin.
“Nëse Xi do të sulmojë Tajvanin, ai më parë do të marrë në telefon Putinin dhe do t’i thotë: ‘Po e bëj këtë, duhet të mbash të zënë Perëndimin në Europë’,” deklaroi Rutte.
Ky paralajmërim vjen në një kohë kur ka frikë në rritje se Rusia po vë në shënjestër shtetet baltike, të gjitha anëtare të NATO-s dhe ish-republika sovjetike.
Rutte theksoi se Perëndimi duhet të veprojë urgjentisht për të parandaluar këtë skenar, përmes forcimit të mbrojtjes dhe bashkëpunimit më të madh me aleatët në rajonin Indo-Paqësor.
Ai lavdëroi gjithashtu qasjen e Donald Trump ndaj diplomacisë me Rusinë, duke thënë:
“Ishte Trump ai që theu bllokimin me Putinin. Ai filloi bisedimet direkte dhe ishte i vetmi që e bëri këtë. Kjo duhej të ndodhte.”
Pavarësisht përpjekjeve për armëpushim, Rutte paralajmëroi se Rusia po prodhon municione me një ritëm alarmues:
“Ata po prodhojnë tre herë më shumë municione në tre muaj sesa e gjithë NATO-ja në një vit. Kjo është e papërballueshme.”
Sipas tij, Rusia po mbështetet gjithashtu te bashkëpunimi me Korenë e Veriut, Kinën dhe Iranin, për të vijuar luftën ndaj Ukrainës.
Nga ana tjetër, ish-presidenti rus Dmitry Medvedev reagoi me tallje ndaj deklaratës së Rutte, duke thënë:
“Ai ka ngrënë shumë kërpudha magjike të preferuara nga hollandezët. Shikon komplote Kinë-Rusi, dhe pastaj një sulm ndaj Europës… Por për një gjë ka të drejtë: duhet të mësojë rusishten, se do t’i hyjë në punë në ndonjë kamp në Siberi.”
Ndërkohë, Rusia vazhdon ofensivën brutale ndaj Ukrainës. Fundjava solli një tjetër valë bombardimesh, me 157 dronë dhe raketa, që goditën Kievin, Kharkivin dhe rajonin e Zaporizhzhias, duke shkaktuar shumë të plagosur, përfshirë një fëmijë 2-vjeçar dhe një grua 46-vjeçare.
