Ish-futbollisti i Kombëtares shqiptare, Igli Tare, është paraqitur këtë të hënë, më 31 gusht, në ambientet e Prokurorisë së Posaçme Antikorrupsion (SPAK), në kuadër të hetimeve për dosjen “Balluku”. Tare po hetohet nën dyshimet për pastrim parash në bashkëpunim me ish-zëvendëskryeministren dhe ish-ministren e Infrastrukturës, Belinda Balluku.
Në fund të korrikut, SPAK ushtroi kontrolle në dy vila në pronësi të Tares në Palasë. Ndërkohë, më herët ishte sekuestruar një vilë në Dhërmi, e regjistruar në emër të ish-futbollistit, por që dyshohet se është në pronësi të tërthortë të Belinda Ballukut.
Balluku po hetohet për korrupsion dhe pastrim parash, ndërsa është e pandehur për akuzën e shkeljes së barazisë në tendera. Hetimet e SPAK vijojnë për të zbardhur lidhjet dhe transaksionet e dyshuara mes personave të përfshirë në dosje.
