Kryeministri Edi Rama ka ndërprerë intervistën me gazetarin amerikan Andrew Callaghan, i cili ndodhet në Shqipëri në kuadër të një materiali për vendin.
Lajmi është bërë i ditur nga vetë “Channel 5”, që ka publikuar një fragment nga intervista dhe ka njoftuar se materiali i plotë do të publikohet javën e ardhshme.
Sipas njoftimit të “Channel 5”, biseda u zhvillua në një kohë kur në Shqipëri po zhvillohen hetime të gjera lidhur me korrupsionin, pastrimin e parave dhe trafikun e drogës.
Në fokus të bisedës kanë qenë gjithashtu marrëdhëniet e biznesit të lidhura me Jared Kushner, dhëndrin e presidentit amerikan Donald Trump, dhe projektet e tij në bregdetin shqiptar.
Sipas raportimeve, Callaghan i ka drejtuar Ramës pyetje të drejtpërdrejta për këto çështje, ndërsa kryeministri është larguar përpara përfundimit të intervistës.
Detajet e plota të përballjes mes gazetarit amerikan dhe kryeministrit pritet të bëhen publike javën e ardhshme, kur “Channel 5” të publikojë të gjithë intervistën.
