Instituti për sëmundje infektive “Robert Koch” njoftoi se 139 persona kanë vdekur nga koronavirusi në Gjermani gjatë 24 orëve të kaluara.
Kështu, numri i përgjithshëm i viktimave të Covid-19 në ekonominë më të madhe të Evropës shkoi në 6,831. Gjermania ka shkallë të ulët të vdekshmërisë nga koronavirusi në krahasim me shtetet kryesore evropiane.
Përpos viktimave, u shënuan edhe 685 raste të reja të infektimeve dhe numri i përgjithshëm i të prekurve shkoi në 163,860.
Hulumtuesit e Universitetit të Bonit thanë se shifra e saktë e të infektuarve me koronavirus mund të jetë dhjetë herë më e lartë se numri zyrtar i rasteve të konfirmuara, shkruan “The Guardian”.
Sidoqoftë, numri i rasteve të reja javëve të fundit ka shënuar rënie dhe qeveria gjermane ka filluar t’i largojë disa nga masat kufizuese, duke vazhduar ta kërkojë respektimin e distancës fizike dhe përdorimin e maskave.
