Numri i punonjësve në administratën publike vjen në rritje çdo vit edhe pse shërbimet kryhen online. Më së shumti vërehet një “fryrje” e të punësuarve në prag zgjedhjesh. Ashtu ndodhi për zgjedhjet e 25 prillit 2021, e njëjta situatë po përsëritet me zgjedhjet që priten të mbahen me 14 maj.
INSTAT raportoi se në tremujorin e fundit të vitit 2022, administrata publik arriti në 184,396 persona ose 2,036 të punësuar më shumë në tremujorin e tretë, teksa punësimi në sektorin privat për të njëjtën periudhë krahasimi pësoi tkurrje e mbi 10 mijë persona.
Kjo tregon se, në tremujorin e fundit të vitit të kaluar, punësimi në administratën publike jo vetëm që u rrit në krahasim me tremujorin e tretë, por edhe me të njëjtën periudhe të vitit 2021.
Kujtojmë se më 2021, kur ishin zgjedhjet e përgjithshme parlamentare, punësimi në sektorin shtetëror u zgjerua me rreth 8 mijë persona ose me 4% brenda një viti.
Sipas të dhënave të INSTAT, pesha e administratës publike në ekonomi, arsimi, shëndetësia dhe aktivitet të punës sociale në totalin e PBB-së shënuan rritje me 2.5 pikë përqindje nga viti 2005 në vitin 2020. Pra një rritje marramendëse shpesh akomodohen në pozicione pune që nuk ekzistojnë fare, por krijohen për interesa partiake.