Safet Bajri, Astmer Bilali dhe Behar Bajri dorëzojnë rekurs në Gjykatën e Lartë për çështjen e bujshme të vrasjes së Fatbardh Licit.
Tre të akuzuarit për një nga vrasjet më të komentuara të viteve të fundit, vrasjen e Fatbardh Liçit në 2018, në Shkodër, kanë ndërmarrë një hap të ri ligjor. Safet Bajri, Astmer Bilali dhe Behar Bajri kanë paraqitur rekurs në Gjykatën e Lartë, duke kundërshtuar vendimin e Gjykatës së Apelit që i la në fuqi dënimet për përfshirje në vrasjen e Fatbardh Licit.
Sipas avokatëve mbrojtës, vendimi i mëparshëm është i padrejtë dhe i mbështetur në prova të dobëta. Ata kërkojnë që Gjykata e Lartë të marrë në konsideratë elementë të rinj dhe të rikonsiderojë të gjithë procesin, duke sjellë një vendim të drejtë dhe të paanshëm.
Ngjarja për të cilën akuzohen ndodhi 7 vite më parë dhe tronditi opinionin publik, pasi u konsiderua si pjesë e një hakmarrjeje të dhunshme ndërmjet grupeve kriminale. Emrat e përfshirë kanë qenë më herët në qendër të hetimeve për veprimtari të paligjshme dhe përfshirje në ngjarje të tjera të rënda, siç është masakra e Dobraçit.
Prokuroria qëndron në qëndrimin e saj, duke argumentuar se provat dhe dëshmitë janë të mjaftueshme për të mbështetur dënimet. Ndërkohë, pala mbrojtëse ngul këmbë se të pandehurit janë viktima të një procesi të paragjykuar dhe kërkon rihapjen e hetimit.
Gjykata e Lartë pritet të vendosë nëse do të pranojë rekursin dhe të shqyrtojë sërish dosjen në seancë të posaçme, ose nëse do ta lërë në fuqi vendimin aktual.
Ky zhvillim ka ringjallur debatin për mënyrën sesi trajtohen çështjet e mëdha kriminale në sistemin gjyqësor shqiptar dhe për rolin e drejtësisë në përballjen me grupe të fuqishme kriminale.
Vendimi për rekursin pritet me interes, ndërsa palët në konflikt shpresojnë në një epilog të drejtë, sipas ligjit.
