Policia ka goditur një tjetër rast të organizimit të kundërligjshëm të lojërave të fatit në Berat, duke zbuluar një lokal të përshtatur për këtë aktivitet në lagjen “Barrikadë”. Si rezultat i operacionit të koduar “Prova”, është arrestuar në flagrancë pronari i subjektit, shtetasi M. N., 51 vjeç.
Sipas autoriteteve, në ambientet e lokalit zhvilloheshin lojëra fati përmes kompjuterëve dhe celularëve. Gjatë kontrolleve janë sekuestruar 12 njësi kompjuterike, një celular, një shumë parash e dyshuar e përfituar nga kjo veprimtari, si dhe një elektroshok.
Operacioni u zhvillua nga specialistët për Hetimin e Trafiqeve dhe Narkotikëve, në vijim të punës për evidentimin e ambienteve që përdoren për aktivitete të paligjshme. Materialet procedurale i janë referuar Prokurorisë së Beratit për veprime të mëtejshme.
