Një nga intelektualët më të mëdhenj të Kosovës, Prof.Dr. Masar Rizvanolli, ndërroi jetë në moshën 87-vjeçare. Vdekja e tij dyshohet se nuk ishte nga shkaqe natyrale.
Mediat vendase raportojnë se ai u gjet katër ditë më parë i vdekur në shtëpinë e tij në Gjakovë, ndërkohë sipas policisë e dyshuara për këtë ngjarje është vajza e tij 58-vjeçare e cila ishte me probleme mendore dhe tashmë është shtruar në spital.
Kush ishte Masar Rizvanolli
Masar Riza Rizvanolli ka lindur në Gjakovë, më 24 maj të vitit 1933. Familja e tij fillimisht ka jetuar në Kukës, në kohën e Jugosllavisë. Prof. Masar Rizvanolli, shkollën fillore e filloi në Kukës, ku mësuesi i tij i parë ishte Ejup Binaku, gjakovar dhe patriot i madh.
Historiani nga Gjakova, Masar Rizvanolli ka qenë edhe Kryetar i shoqatës së Intelektualëve “Jakova”. Ai ka qenë edhe autor i shumë librave historikë për ruajtjen dhe promovimin e trashëgimisë kulturore.