Presidenti amerikan Donald Trump iu ka premtuar mbështetësve të tij se do të ketë një protestë të “egër” në Uashington më 6 janar, pikërisht ditën kur kongresi amerikan ka planifikuar të mblidhet për të finalizuar zyrtarisht rezultatin e zgjedhjeve të 3 nëntorit 2020.
“Statistikisht është e pamundur të kemi humbur zgjedhjet e 2020. Do të ketë një protestë të madhe më 6 janar, Ejani atje. Do të jetë një protestë e egër”, -ka bërë thirrje Trump në ‘Twitter’ që në muajin dhjetor, një thirrje që e ka përsëritur herë pas here, teksa pretendon se zgjedhjet e 2020 u manipuluan dhe se fitues nuk është Biden por vetë ai. Kjo është hera e parë që një president amerikan bën thirrje për mbajtjen e protestave në kundërshtim të rezultatit të zgjedhjeve. Mbledhja e kongresit më 6 janar konsiderohet thjesht si një formalitet, ku thjesht senatorët aprovojnë rezultatin.
Biden fitoi zgjedhjet me 306 vota elektorale, ndërsa Trump mori 232 vota të tilla, një rezultat i konfirmuar nga Kolegji Zgjedhir më 14 dhjetor. Disa republikanë pro-Trumpit janë shprehur se kanë në plan të prishin procesin zyrtar më 6 janar. Dy javë më vonë më 20 janar pritet inaugurimi i Biden si president i 46-të i Shteteve të Bashkuara të Amerikës. Trump raportohet se është shprehur se mund të refuzojnë të largohet nga Shtëpia e Bardhë atë ditë. Biden është shprehur në një intervistë se nuk e shqetëson personalisht fakti që Trump mund të mos jetë në ceremoninë e inaugurimit të tij, por e shqetëson fakti sesi do të duket mungesa e prezencës së tij në sytë e pjesës tjetër të botës.
burimi: boldnews
