Prokuroria holandeze ka dorëzuar vendimin përmes të cilit kërkon dënimin me 2 vjet e gjysmë për Eljo Bitrin, shqiptarin e kërkuar nga SPAK dhe në Belgjikë për vrasje. Në 2022 autoritet holandeze kanë arrestuar Bitrit dhe Ohran K., 49 vjeç nga Serbia, të cilët i kanë cilësuar si dy kriminelë të rrezikshmërisë së lartë.
Ata të dy u arrestuan gjatë një kontrolli kufitar në nëntor të vitit të kaluar, ku u gjetën tre armë zjarri të mbushura në një vend të posaçëm në makinën me qira të të dyve. Prokuroria Publike kërkon që të dy personat e ndaluar të shkojnë në burg për 30 muaj.
Bitri shqiptar ishte shpallur në kërkim në kuadër të operacionit “Plumbi i Artë”, operacion në të cilin ra në pranga i shumëkërkuari Nuredin Dumani. Bitri, i njohur ndryshe me emrin Bledar Debrova, u përmend në dëshmitë e Nuredin Dumanit, teksa e cilëson atë si një prej personave që kanë planifikuar vrasjen e Sokol Sanxhaktarit.
Mbi Bitrin rëndojnë 7 akuza, mes të cilave vrasja e Dorjan Shkozës dhe Anxhelo Avdiajt, Emiljano Ramazanit, Sokol Sanxhaktarit, sulmi me eksploziv i banesës së Talo Çelës e të tjera.
