I përfshirë në trafikun e kokainës, sekuestrohen pasuritë e Eldi Dizdarit

I përfshirë në trafikun e kokainës, sekuestrohen…

Gjykata e Apelit ka lënë në fuqi vendimin për konfiskimin e pasurive të Denis Matoshit alias Eldi Dizdari, dhe kalimin e tyre në favor të shtetit!

Bëhet fjalë për 1 apartament, 1 garazh, 1 truall, 1 dyqan të gjitha të ndodhura në Tiranë, 40 mijë euro dhe vlerën afro 8.2 milion lekë të cilën Dizdari e kishte përfituar nga shpronësimi i një pasurie.

35-vjeçari është i shpallur në kërkim ndërkombëtar, madje njihet si një personazh me lidhje në fushën e trafikimit të lëndëve narkotike dhe kërcënimeve ndaj jetës. Drejtësia Italiane e ka dënuar shqiptarin me ‘Arrest në Burg’, si të përfshirë në një organizatë kriminale me qëllim trafikimin e lëndëve narkotike në sasi të mëdha.

Sipas hetimeve, organizata ku bënte pjesë Eldi Dizdari që prej vitit 2015 e në vazhdim ka trafikuar disa herë sasi të mëdha me kokainë.

Dizdari ka qenë i përfshirë në një ngjarje kriminale të ndodhur në 4 tetor 2018 në zonën e ish-Bllokut në Tiranë, ku nga të shtënat me armë humbi jetën Fabiol Goxha dhe mbetën të plagosur Ervis Martinaj dhe Eljo Hato.

35-vjeçari nga ajo kohë u shpall në kërkim nga autoritetet e vendit tonë, ndërsa dyshohet se është dhe porositësi i një ngarkese me 613 kg kokainë të kapur në kontenierët me babanë në portin e Durrësit.

NJOFTIMI I SPAK

Prokuroria e Posaçme kundër Korrupsionit dhe Krimit të Organizuar, bazuar në ligjin Nr.10 192, datë 03.12.2009, i ndryshuar, “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë”, ka paraqitur para Gjykatës së Shkallës së Parë për Korrupsionin dhe Krimin e Organizuar, kërkesën për konfiskimin e pasurive të subjektit Denis Matoshi (Eldi Dizdari), i cili rezulton të jetë të shpallur në kërkim ndërkombëtar nga Interpol Roma/Itali, pasi Gjykata e Firences/Itali me Vendimin nr. 9065/15 RGNR 56909/19 RG GIP, datë 25.11.2019, ka caktuar ndaj tij, masën e sigurisë “Arrest me burg”, për kryerjen e veprës penale “Organizatë kriminale me qëllim trafikimin e narkotikëve në sasi të mëdha”, parashikuar nga legjislacioni penal i Republikës së Italisë.

Sipas të dhënave të dërguara nga letërporosia italiane rezulton se, organizata kriminale në të cilën bën pjesë shtetasi Denis Matoshi, nga viti 2015 e në vazhdim, ka trafikuar në disa raste kokainë.

Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar, me Vendimin nr.34, datë 22.12.2023, ka vendosur ndër të tjera, konfiskimin dhe kalimin në favor të shtetit, të pasurive si më poshtë:

Pasuria e llojit “Njësi”, e ndodhur në Zona Kadastrale nr.8160, Rruga “Bajram Curri”, Tiranë, me sip. totale 198.1m2, në pronësi të shtetasit Denis Matoshi;

Pasuria e llojit “Garazh”, e ndodhur në Zona Kadastrale nr.8160, Rruga “Bajram Curri”, Tiranë, me sip. totale 14.3m2, në pronësi të shtetasit Denis Matoshi;

Pasuria e llojit “Truall”, me sipërfaqe 5269 m2, Zona Kadastrale nr.8160, rruga “Dervish Hima”, Tiranë, pjesa takuese 2163/30000, në pronësi të shtetasit Denis Matoshi, pasuri që është në bashkëpronësi.

Të drejtën e shtetasit Denis Matoshi, për të përfituar vlerën e shpronësimit nga Komisioni i Posaçëm për Shpronësim për shpronësimin në pasurinë me nr. 6/380, Zona Kadastrale nr.8160, rruga “Dervish Hima”, si bashkëpronar në këtë pasuri në pjesë takuese 120005/1680000, me vlerë paraprake të shpronësimit 8.180.125.82 lekë.

Shuma e parave prej 40 000 (dyzetë mijë) Euro, ndodhur në llogarinë bankare të noterit;

Pasuria e ndodhur në Zona Kadastrale nr.8310, Rruga “Gjergj Legisi”, Tiranë, e llojit “Apartament” me sip. totale 65.32m2, në pronësi të shtetasit B.Sh.;

Gjykata e Posaçme e Apelit për Korrupsionin dhe Krimin e Organizuar, me vendimin nr.100, datë 29.05.2024, ka vendosur:  Lënien në fuqi të vendimit nr. 34, datë 22.12.2023, të Gjykatës së Posaçme të Shkallës së Parë për Korrupsionin dhe Krimin e Organizuar.

Më Të Klikuarat

Lajmet e fundit