Në zonën e Astirit kanë vijuar prishjet e banesave për vijimin e projektit të Unazës së Re.
Banorët e këtyre shtëpive kanë dalë të protestojnë dhe njëra prej tyre ka thënë për mediat se funksionarë të lartë të institucioneve shtetërore i kanë kërkuar ryshfet për të mos i prishur shtëpinë e saj.
Ajo ka thënë se i kishte shkuar një sekser në shtëpi dhe i kishte kërkuar 10 mijë euro, por kërkesa nuk i ka ardhur drejtpërdrejt nga funksionari shtetëror.
Gruaja theksoi se drejtori i IKMT-së së Tiranës i ka thënë se ndërtesa do të prishet pavarësisht se ajo është jashtë hartës së projektit.
Sipas saj, prishjet në këto momente janë selektive ku ata të cilët kanë paguar nuk u prishet komplet ndërtesa por deri te matjet, ndërkohë që atyre që nuk kanë paguar u prishet e gjithë banesa pavarësisht matjeve të projektit.
“Kanë filluar prishjet prej 4 ditësh dhe IKMT-ja po ndjek dy standarde. Këto standarde janë, kush paguan do ju ngelet një pjesë e banesës nga projekti dhe kush nuk paguan do t’ju prishet komplet. Kjo gjë po ndodh po praktikisht me banesën time, unë i kam hapur rrugë projektit te vija e kuqe ku është bërë matja dhe ku është vendosur x-i dhe punonjësit e IKMT-së thon që ajo duhet të prishet ndërkohë që ajo pjesë nuk e pengon fare projektin. Këtu po bëhen matrapazlliqe dhe pazare si te tregu i fruta perimeve. Normalisht që disa kanë paguar, mua ma sollën sekserin sot në mëngjes dhe më thanë se nëse do paguaja ai objekt s’do prishej sot. Flitet për shuma nga 10 mijë euro e sipër, këto të shohi Erion Veliaj dhe qeveria.
Personi ka qenë dje dhe më ka thënë se objekti yt do prishet, është drejtori i IKMT-së Erges Sheqeri, nuk e di se kush i kërkon paratë se dërgojnë sekserat e tyre. Nuk e di kush i kërkon paratë, por janë drejtorat e Erion Velisë, për këtë të hetojë prokuroria dhe SPAK.
Ti jap 10 mijë euro IKMT-së unë nuk kam, më mirë le ta prishin”,- tha gruaja për Fax Web.
