Kryeministri i Izraelit Benjamin Netanyahu thotë se Irani do të “paguajë”, pasi gjuajti rreth 180 raketa në Izrael të martën. Ai tha se vendi i tij është i vendosur të hakmerret, duke shtuar se Teherani “bëri një gabim të madh sonte”.
Irani tha se breshëria ishte një akt “vetëmbrojtjeje” në përgjigje të “akteve agresive” të Izraelit, duke përfshirë vrasjen e liderit të Hezbollahut, Hassan Nasrallah. Disa nga raketat e lëshuara nga Irani ishin raketa hipersonike Fattah , me një shpejtësi maksimale të vlerësuar në 10,000 mph. Sipas Gardës Revolucionare , 90% e raketave të saj goditën me sukses objektivat e tyre edhe pse Izraeli thotë se shumica e raketave u kapën nga mbrojtja e tij ajrore.
Sulmet në Bejrut vazhduan gjatë natës dhe ushtria izraelite lëshoi disa urdhra evakuimi gjatë natës, ndërsa vazhdoi të synonte periferitë jugore të kryeqytetit, Dahieh, një bastion i Hezbollahut.
Ndërsa Izraeli përgatitej për sulmin iranian, persona të armatosur hapën zjarr në një rrugë në Tel Aviv, duke vrarë të paktën shtatë dhe duke plagosur disa të tjerë.
Forcat e Mbrojtjes së Izraelit kanë lëshuar një paralajmërim të ri, duke raportuar luftime të ashpra që po zhvillohen në Libanin jugor kundër Hezbollahut. IDF u kërkoi izraelitëve të shkonin në “hapësirat e mbrojtura nëse dëgjoheshin sirenat”.
“Për sigurinë tuaj personale, ju kërkojmë të mos udhëtoni me automjet nga zona në veri të lumit Litani në jug të tij. IDF do të ndërpresë lëvizjet e elementëve të Hezbollahut dhe do t’i pengojë ata të kryejnë sulmet e tyre. Ky paralajmërim është në fuqi deri në një njoftim të dytë”.
