Parlamenti iranian miratoi një projektligj që mbyll ngushticën e Hormuzit, rrugën më të rëndësishme detare për naftën dhe gazin në botë
Ngushtica e Hormuzit është kthyer sërish në vëmendjen ndërkombëtare pasi parlamenti i Iranit ka mbyllur diskutimin për një projektligj që bllokon këtë korridor jetik detar.
Rreth 20% e furnizimit global me naftë dhe gaz kalon çdo ditë përmes kësaj ngushtice strategjike, e cila lidh Gjirin Persik me Gjirin e Omanit. Veprimi për ta bllokuar këtë rrugë do të ketë pasoja të rënda për tregjet globale të energjisë.
Sipas mediave iraniane, ky është një reagim ndaj përshkallëzimit të tensioneve në rajon dhe pranisë ushtarake të SHBA-së dhe aleatëve në ujërat e Gjirit. Ligjvënësit iranianë e konsiderojnë mbylljen e ngushticës si një përgjigje “strategjike dhe legjitime”.
Një numër deputetësh kanë deklaruar publikisht se vendet që mbështesin Izraelin apo sanksionojnë Iranin nuk kanë më qasje të lirë në këtë rrugë detare. “Nëse ata kërcënojnë interesat tona, atëherë edhe ne kemi të drejtë të mbrojmë kufijtë tanë ekonomikë dhe detarë”, ka thënë një prej anëtarëve të parlamentit.
Ngushtica e Hormuzit ka qenë më parë një pikë tensioni ushtarak dhe ekonomik. Irani po bllokon anijet që kalojnë aty. Një vendim i tillë do të sjellë rritje të menjëhershme të çmimeve të naftës në tregjet ndërkombëtare.
Ekspertët e sigurisë dhe tregut të energjisë paralajmërojnë se ky hap çon në destabilizim rajonal, përplasje ushtarake dhe pasoja ekonomike të pallogaritshme. Ata theksojnë se komuniteti ndërkombëtar duhet të reagojë menjëherë për të parandaluar përshkallëzimin.
Nga ana tjetër, retorika anti-perëndimore është shtuar ndjeshëm ditët e fundit.
Organizata ndërkombëtare të transportit detar dhe eksportues të naftës kanë shprehur shqetësim të madh për sigurinë e ngarkesave që kalojnë përmes ngushticës.
Kombet e Bashkuara dhe BE kanë kërkuar që të shmanget çdo veprim që mund të cënojë sigurinë detare dhe tregtinë ndërkombëtare të energjisë.
Pasojat do të ndihen menjëherë në bursat e naftës dhe do të ndikojnë në furnizimin global me energji.
Situata në rajon mbetet e tensionuar, ndërsa vëmendja e botës është përqendruar në vendimet që pritet të marrë Irani në ditët në vijim, për ta mbajtur të bllokuar ose jo ngushticën.
