Forcat e Mbrojtjes së Izraelit (IDF) kanë paralajmëruar banorët në 24 zona të ndryshme në Liban, përfshirë 14 zona në kryeqytetin Bejrut, se do të kryejnë sulme ajrore brenda disa orësh dhe gjatë gjithë natës.
IDF ka deklaruar se sulmet do të përqendrohen në banka dhe infrastrukturë financiare që mbështesin grupin militant Hezbollah. Më vonë, korrespondentët raportuan se tetë sulme ajrore kanë ndodhur në distriktin Dahieh në jug të Bejrutit, një zonë nën kontrollin e Hezbollahut.
Në të njëjtën kohë, Hezbollah tha se kishte lëshuar më shumë raketa drejt Izraelit, duke synuar bazat ushtarake.
Një përfaqësues i IDF paralajmëroi qytetarët që të largohen nga zonat pranë strukturave që mbështesin aktivitetet terroriste të Hezbollahut, duke shtuar se objektivat e sulmeve do të zbulohen në ditët në vijim. Ndërkohë, agjencia shtetërore e lajmeve të Libanit raportoi një sulm në zonën Bekaa në lindje të vendit.
Po ashtu, ushtria libaneze njoftoi se tre ushtarë u vranë pas një sulmi ajror izraelit në jug të Libanit, në Nabatieh.
Hezbollah ka thënë se po sulmon infrastrukturën e ushtrisë izraelite në solidaritet me Hamasin në Rripin e Gazës.
