Mbrëmjen e së martës, mediat italiane i dhanë jehonë lajmit që është arrestuar Klisman Nikolli.
27-vjeçari akuzohej se ka kryer një sërë vjedhjesh në Itali, ndërsa në Shqipëri ushtronte profesionin e policit.
Nëna e 27-vjeçarit Gjelina Nikolli deklaroi se ai ndodhet në Gjermani.
“Ne jemi familje dëshmori. Janë të gjitha gënjeshtra, shpifje e intriga të keqdashësve të familjes Nikolli”, deklaroi ajo.
Ndërkohë drejtori i Përgjithshëm i Policisë së Shtetit Muhamet Rrumbullaku firmosi sot përjashtimin e tij nga Policia.
Policia e Shtetit përmes një komunikate për mediat bën me dije se gjatë kohës që 27-vjeçari ka kryer grabitjet në Itali ka qenë me leje për arsye shëndetësore pa të drejtë page.
Mediat italiane raportuan se 27-vjeçari Klisman Nikolli akuzohet si autor i 18 grabitjeve së bashku me Viktor Bilani dhe Flor Koca.
