Seanca në Kolegjin e Posaçëm të Apelimit për gjyqtaren e Gjykatës së Tiranës, Regleta Panajoti mori një kthesë të papritur të enjten, pasi kryesuesi i trupës, Ardian Hajdari deklaroi se ajo i kishte njoftuar përmes email-it se kishte paraqitur një kërkesë për dorëheqje në Këshillin e Lartë Gjyqësor.
“Përsëri, nëpërmjet komunikimeve elektronike, subjekti na njofton se ka kryer kërkesën për dorëheqje dhe kërkon shtyrjen e seancës publike të planifikuar për sot, deri në momentin që KLGj të shqyrtojë dhe të vendosë mbi kërkesën e saj… ,’ sqaroi Hajdari.
Siç u bë me dije në seancë, Panajoti e ka dorëzuar kërkesën për dorëheqje në KLGJ më 24 qershor. Megjithatë, Komisioneri Publik, Florian Ballhysa kërkoi vazhdimin e gjykimit për subjektin.
“Lidhur me kërkesën për shtyrje, sjell në vëmendje se ky proces po kryhet me procedurë të përshpejtuar për shkak të një kërkese të KED,” pohoi Ballhysa. Ai shtoi se nëse Kolegji vlerësonte se seanca duhej shtyrë, kjo mund të kryhej për të dëgjuar vullnetin e subjektit për t’u dorëhequr.
Gjyqtarja Regleta Panajoti –kandidate për një post në Gjykatën Kushtetuese u konfirmua nga Komisioni i Pavarur i Kualifikimit, KPK me shumicë votash më 26 qershor 2019. Pro konfirmimit të saj votuan Genta Tafa Bungo dhe anëtarja Valbona Sanxhaktari. Ndërsa komisioneri Lulzim Hamitaj argumentoi në mendimin e pakicës se “subjekti kishte mungesë prej 3.8 milionë lekësh” dhe duhej shkarkuar për deklarim të pamjaftueshëm.
Komisioneri Publik, Florian Ballhysa e ankimoi vendimin e marrë me shumicë votash për konfirmimin në detyrë të gjyqtares Regleta Panajoti, me argumentin se ajo nuk e justifikon pasurinë dhe nuk ka bërë deklarim të mjaftueshëm në këtë kriter. “Komisioneri Publik, nga shqyrtimi i vendimit nr. 169/2019, çmon se ai është i cenueshëm në tërësinë e tij,”thotë në ankim Komisioneri.
Dorëheqja nga statusi i magjistratit sjell ndëprerjen e procesit të vetingut dhe ndalimin e subjektit për t’u emëruar në çdo pozicion të sistemit të drejtësisë për 15 vitet e ardhshme. Megjithatë, trupa e KPA-së u tërhoq për një orë dhe vendosi të shtyjë seancën më 10 korrik, ora 10:00, duke e ftuar gjyqtaren Regleta Panajoti të dëgjohet lidhur me kërkesën e saj.
Si u përdor nga Frangaj
Në 21 shkurt 2020, një gjyq me interes të madh financiar, po zhvillohej në Gjykatën e Tiranës, me gjyqtare Regleta Panajoti. Gjyqi kishte të bënte me aksionet e DIGITALB.
Pak javë para se të zhvillohej kjo seancë, aksionet e DIGITALB ishin tjetërsuar nga Aleksandër Frangaj dhe një grup biznesmenësh, në mënyrë të njëanshme. Skandali shkonte deri aty, sa zyra përmbarimore që kishte ekzekutuar kalimin e aksioneve, nuk kishte lënë hapësirë për ta ankimuar. Pikërisht ky veprim i zyrës përmbarimore, u kërkua që të pezullohej në gjyqin me Regleta Panajotin, derisa aksionerët të zgjidhnin mosmarrëveshjen mes tyre.
Por gjyqtarja Panajoti vendosi konfirmimin e paligjshmërisë, duke bërë që Frangaj të hynte dhunshëm si aksioner në DIGITALB, në shkelje me marrëveshjen. Burime jozyrtare për gazetën SHQIP bëjnë me dije se Panajoti për këtë shërbim të kryer, kishte marrë premtimin e Frangajt, se do të kalonte vettingun në shkallën e dytë, në KPA. Në fakt, sot që flasim, Regleta po largohet nga sistemi i drejtësisë si një viktimë e Frangajt. Ajo ka dhënë dorëheqjen si gjyqtare, pasi ka mësuar se KPA do ta shkarkojë. Njësoj si Regleta, mund të digjen shumë gjyqtarë që marrin garanci nga Frangaj apo ndonjë biznesmen tjetër, se do të kalojnë Vetting-un. Sepse Frangaj nuk ka asnjë influencë në organet e Vetting-ut! /Gazetaatdheu.com/
