Autoritetet meksikane dhe amerikane po punojnë së bashku për të gjetur katër amerikanë, të cilët u sulmuan nga persona të armatosur në veri të Meksikës dhe u rrëmbyen menjëherë, pasi kaluan kufirin mes dy vendeve.
Katër amerikanët, identitetet e të cilëve nuk janë bërë të ditur, ishin në një furgon të bardhë me targa të Karolinës së Veriut kur kaluan të premten e kaluar nëpër Matamoros, shteti Tamaulipas, Meksikë. Lajmin e bëri të ditur Ambasada e SHBA, e cila bën thirrje për ndihmë nga qytetarët për të identifikuar rrëmbyesit.
Personat e armatosur dyshohet se kanë qëlluar pasagjerët e furgonit dhe më pas i kanë futur në një automjet tjetër dhe janë larguar nga zona. Një zyrtar meksikan i tha Reuters se viktimat e rrëmbimit ishin tre burra dhe një grua. Ambasadori amerikan në Meksikë, Ken Salazar, tha se një “meksikan i pafajshëm” u vra gjatë incidentit.
Presidenti meksikan Andres Manuel Lopez Obrador tha sot se amerikanët kaluan kufirin për të blerë ilaçe dhe se Ministria e Sigurisë Publike po punonte me FBI-në për të gjetur pengjet. FBI ofroi një shpërblim prej 50,000 dollarësh për kthimin e të katërve dhe arrestimin e personave të përfshirëve në sulm.