Njëzet e një trupa janë gjetur deri më tani në një pyll në Kenian lindore si pjesë e një hetimi për vdekjen e anëtarëve të një sekti, udhëheqësi i të cilit u arrestua javën e kaluar dhe dyshohet se u kërkoi atyre të agjëronin deri në vdekje për të “takuar Jezusin”. Lajmi u bë i ditur nga mediat e huaja, të cilat iu referuan burimeve policore.
“Që nga e premtja, kur filloi zhvarrosja, ne kemi gjetur gjithsej 21 trupa në pyllin Sakahola. Ne kemi gërmuar vetëm sipërfaqen, gjë që dyshohet se do të kemi më shumë njerëz të vdekur kur të përfundojë kërkimi”, tha një burim policor për AFP në kushte anonimiteti.
Burimet konfirmuan se të paktën tre fëmijë ishin në mesin e viktimave. Trupat e katër anëtarëve të Kishës Ndërkombëtare të Lajmit të Mirë, të kryesuar nga Paul Mackenzie Dhenge, u gjetën javën e kaluar. Policia ka hetuar zonën pasi kishte informacione për ekzistencën e një varri masiv në këtë pyll.
Njëmbëdhjetë besimtarë të tjerë, shtatë burra dhe katër gra, të moshës nga 17 deri në 49 vjeç, u dërguan në spital javën e kaluar, pasi u shpëtuan nga pylli Sakahola. Mackenzie Dhenge u dorëzua më 15 prill në polici dhe u dërgua në paraburgim.
Në një raport të marrë nga Agence France-Presse, policia tha se kishte marrë informacione se “njerëzit vdisnin nga uria nën pretendimin e takimit me Jezusin pasi iu ishte larë truri nga një i dyshuar, Mackenzie Dhenge, një pastor i Kishës Ndërkombëtare të Lajmit të Mirë”.
Sipas mediave lokale, pastori u arrestua muajin e kaluar dhe u procedua pasi dy fëmijë vdiqën nga uria ndërsa ishin nën kujdesin e prindërve të tyre. Mackenzie Dhenge u lirua më pas me kusht prej 100,000 shilinga keniane (një shumë e barabartë me afërsisht 670 euro). Janë arrestuar edhe gjashtë besimtarë.
Çështja do të shqyrtohet nga një gjykatë lokale më 2 maj.
