Në fushën e korrupsionit, raporti evidenton hetime ndaj 30 zyrtarëve dhe ish-zyrtarëve të lartë, nga të cilët 18 janë dërguar për gjykim dhe 10 janë dënuar me vendim të formës së prerë gjatë vitit 2025. Paralelisht, çështjet e reja për korrupsion janë rritur me rreth 18%, ndërsa çështjet e përfunduara me 12%, duke reflektuar një aktivitet më të lartë hetimor. Në total, SPAK ka dërguar në gjykatë 147 të pandehur për korrupsion në nivele të ndryshme të administratës publike.
Në deklarimet e tij, Braho theksoi se “korrupsioni në institucionet publike dhe në sistemin e drejtësisë mbetet një fenomen shqetësues”, duke përfshirë funksionarë vendorë, administrativë si dhe përfaqësues të sistemit të drejtësisë. Ai shtoi se krimi i organizuar po shfaq forma gjithnjë e më të sofistikuara, përmes komunikimeve të enkriptuara dhe skemave financiare komplekse, ndërsa bashkëpunimi ndërkombëtar mbetet kyç në hetime: “Krimi i organizuar nuk kufizohet nga kufiri shtetëror, për këtë arsye, edhe reagimi procedural duhet të jetë i koordinuar, profesional dhe ndërkombëtar.”
